150. สญฺชีวชาตกํ
[150]
อสนฺตํ โย ปคฺคณฺหาติ, อสนฺตํ จูปเสวติ;
ตเมว ฆาสํ กุรุเต, พฺยคฺโฆ สญฺชีวโก ยถาติฯ
สญฺชีวชาตกํ ทสมํฯ
กกณฺฏก [ปาปเสวน (ก.)] วคฺโค ปนฺนรสโมฯ
ตสฺสุทฺทานํ –
สุขเมธติ ทณฺฑวโร จ ปุน, ลสิ วาลธิ ปญฺจมราธวโร;
สมโหทธิ กตฺติก โพนฺทิ ปุน, จตุรงฺคุลพฺยคฺฆวเรน ทสาติฯ
(อุปริโม ปณฺณาสโกฯ) [( ) สีหฬโปตฺถเกเยว ทิสฺสติ]
อถ วคฺคุทฺทานํ –
อปณฺณกํ สีลวคฺคกุรุงฺค, กุลาวกํ อตฺถกาเมน ปญฺจมํ;
อาสีโส อิตฺถิวรุณํ อปายิ, ลิตฺตวคฺเคน เต ทส;
ปโรสตํ หํจิ กุสนาฬิ [หํสิ สริกฺขํ (สพฺพตฺถ)], อสมฺปทํ กกณฺฏกวคฺโคฯ
เอกนิปาตมฺหิลงฺกตนฺติฯ
เอกกนิปาตํ นิฏฺฐิตํฯ
2. ทุกนิปาโต
1. ทฬฺหวคฺโค
151. ราโชวาทชาตกํ (2-1-1)
[1]
ทฬฺหํ ทฬฺหสฺส ขิปติ, พลฺลิโก [มลฺลิโก (สี. ปี.)] มุทุนา มุทุํ;
สาธุมฺปิ สาธุนา เชติ, อสาธุมฺปิ อสาธุนา;
เอตาทิโส อยํ ราชา, มคฺคา อุยฺยาหิ สารถิฯ
[2]
อกฺโกเธน ชิเน โกธํ, อสาธุํ สาธุนา ชิเน;
ชิเน กทริยํ ทาเนน, สจฺเจนาลิกวาทินํ;
เอตาทิโส อยํ ราชา, มคฺคา อุยฺยาหิ สารถีติฯ
ราโชวาทชาตกํ ปฐมํฯ
152. อสเมกฺขิตกมฺมนฺตํ, ตุริตาภินิปาตินํฯ
สานิ กมฺมานิ ตปฺเปนฺติ, อุณฺหํวชฺโฌหิตํ มุเขฯ
[4]
สีโห จ สีหนาเทน, ททฺทรํ อภินาทยิ;
สุตฺวา สีหสฺส นิคฺโฆสํ, สิงฺคาโล [สิคาโล (สี. สฺยา. ปี.)] ททฺทเร วสํ;
ภีโต สนฺตาสมาปาทิ, หทยญฺจสฺส อปฺผลีติฯ
สิงฺคาลชาตกํ [สิคาลชาตกํ (สี. สฺยา. ปี.)] ทุติยํฯ
153. สูกรชาตกํ (2-1-3)
[5]
จตุปฺปโท อหํ สมฺม, ตฺวมฺปิ สมฺม จตุปฺปโท;
เอหิ สมฺม [สีห (สี. ปี.)] นิวตฺตสฺสุ, กิํ นุ ภีโต ปลายสิฯ
[6]
อสุจิ ปูติโลโมสิ, ทุคฺคนฺโธ วาสิ สูกร;
สเจ ยุชฺฌิตุกาโมสิ, ชยํ สมฺม ททามิ เตติฯ
สูกรชาตกํ ตติยํฯ
154. อุรคชาตก (2-1-4)
[7]
อิธูรคานํ ปวโร ปวิฏฺโฐ, เสลสฺส วณฺเณน ปโมกฺขมิจฺฉํ;
พฺรหฺมญฺจ วณฺณํ [วกฺกํ (ก.)] อปจายมาโน, พุภุกฺขิโต โน วิตรามิ [วิสหามิ (ก. สิ. สฺยา. ปี.)] โภตฺตุํฯ
[8]
โส พฺรหฺมคุตฺโต จิรเมว ชีว, ทิพฺยา จ เต ปาตุภวนฺตุ ภกฺขา;
โย พฺรหฺมวณฺณํ อปจายมาโน, พุภุกฺขิโต โน วิตราสิ [สพฺพตฺถปิ สมานํ] โภตฺตุนฺติฯ
อุรคชาตกํ จตุตฺถํฯ
155. ภคฺคชาตกํ (2-1-5)
[9]
ชีว วสฺสสตํ ภคฺค [คคฺค (สี. ปี.)], อปรานิ จ วีสติํ [วีสติ (สฺยา. ก.)];
มา มํ ปิสาจา ขาทนฺตุ, ชีว ตฺวํ สรโท สตํฯ
[10]
ตฺวมฺปิ วสฺสสตํ ชีว, อปรานิ จ วีสติํ;
วิสํ ปิสาจา ขาทนฺตุ, ชีว ตฺวํ สรโท สตนฺติฯ
ภคฺคชาตกํ ปญฺจมํฯ
156. อลีนจิตฺตชาตกํ (2-1-6)
[11]
อลีนจิตฺตํ นิสฺสาย, ปหฏฺฐา มหตี จมู;
โกสลํ เสนาสนฺตุฏฺฐํ, ชีวคฺคาหํ อคาหยิฯ
[12]
เอวํ นิสฺสยสมฺปนฺโน, ภิกฺขุ อารทฺธวีริโย;
ภาวยํ กุสลํ ธมฺมํ, โยคกฺเขมสฺส ปตฺติยา;
ปาปุเณ อนุปุพฺเพน, สพฺพสํโยชนกฺขยนฺติฯ
อลีนจิตฺตชาตกํ ฉฏฺฐํฯ
157. คุณชาตกํ (2-1-7)
[13]
เยน กามํ ปณาเมติ, ธมฺโม พลวตํ มิคี;
อุนฺนทนฺตี วิชานาหิ, ชาตํ สรณโต ภยํฯ
[14]
อปิ เจปิ ทุพฺพโล มิตฺโต, มิตฺตธมฺเมสุ ติฏฺฐติ;
โส ญาตโก จ พนฺธุ จ, โส มิตฺโต โส จ เม สขา;
ทาฐินิ มาติมญฺญิตฺโถ [มญฺญิโว (สฺยา.), มญฺญวฺโห (ก.)], สิงฺคาโล มม ปาณโทติฯ
คุณชาตกํ สตฺตมํฯ
158. สุหนุชาตกํ (2-1-8)
[15]
นยิทํ วิสมสีเลน, โสเณน สุหนู สห;
สุหนูปิ ตาทิโสเยว, โย โสณสฺส สโคจโรฯ
[16]
ปกฺขนฺทินา ปคพฺเภน, นิจฺจํ สนฺทานขาทินา;
สเมติ ปาปํ ปาเปน, สเมติ อสตา อสนฺติฯ
สุหนุชาตกํ อฏฺฐมํฯ
159. โมรชาตกํ (2-1-9)
[17]
อุเทตยํ จกฺขุมา เอกราชา, หริสฺสวณฺโณ ปถวิปฺปภาโส [ปฐวิปฺปภาโส (สี. สฺยา. ปี.)];
ตํ ตํ นมสฺสามิ หริสฺสวณฺณํ ปถวิปฺปภาสํ, ตยาชฺช คุตฺตา วิหเรมุ ทิวสํฯ
เย พฺราหฺมณา เวทคู สพฺพธมฺเม, เต เม นโม เต จ มํ ปาลยนฺตุ;
นมตฺถุ พุทฺธานํ [พุทฺธาน (?)] นมตฺถุ โพธิยา, นโม วิมุตฺตานํ [วิมุตฺตาน (?)] นโม วิมุตฺติยา;
อิมํ โส ปริตฺตํ กตฺวา, โมโร จรติ เอสนาฯ
[18]
อเปตยํ จกฺขุมา เอกราชา, หริสฺสวณฺโณ ปถวิปฺปภาโส;
ตํ ตํ นมฺมสฺสามิ หริสฺสวณฺณํ ปถวิปฺปภาสํ, ตยาชฺช คุตฺตา วิหเรมุ รตฺติํฯ
เย พฺราหฺมณา เวทคู สพฺพธมฺเม, เต เม นโม เต จ มํ ปาลยนฺตุ;
นมตฺถุ พุทฺธานํ นมตฺถุ โพธิยา, นโม วิมุตฺตานํ นโม วิมุตฺติยา;
อิมํ โส ปริตฺตํ กตฺวา, โมโร วาสมกปฺปยีติฯ
โมรชาตกํ นวมํฯ
160. วินีลชาตกํ (2-1-10)
[19]
เอวเมว นูน [นุ (ก.)] ราชานํ, เวเทหํ มิถิลคฺคหํ;
อสฺสา วหนฺติ อาชญฺญา, ยถา หํสา วินีลกํฯ
[20]
วินีล ทุคฺคํ ภชสิ, อภูมิํ ตาต เสวสิ;
คามนฺตกานิ [คามนฺติกานิ (สี.), คามนฺตรานิ (ก.)] เสวสฺสุ, เอตํ มาตาลยํ ตวาติฯ
วินีลชาตกํ ทสมํฯ
ทฬฺหวคฺโค ปฐโมฯ
ตสฺสุทฺทานํ –
วรพลฺลิก ททฺทร สูกรโก, อุรคูตฺตม ปญฺจมภคฺควโร;
มหตีจมุ ยาว สิงฺคาลวโร, สุหนุตฺตม โมร วินีลํ ทสาติฯ
2. สนฺถววคฺโค
161. อินฺทสมานโคตฺตชาตกํ (2-2-1)
[21]